Valentines day chu naktip lawk a ni ta a, kum dang ang bawkin dam taka kan awm chuan Mizoramah pawh kan hmang leh ngei ang. Engtik atang chiah khan nge V.Day hi Mizoramah kan hman ve tan tih erawh sawi a har angreng khawp mai. A rawn chhuah dan leh hnampui lamten engtin nge an hman tih lam chu kum tin deuh tho hian daily newspaper ah an rawn ziak thin, ziah nawn angai tawh awm love. V. Day hi tute tan nge ? Engtia hman tur nge ? Tih lam hi kan hre khingbai deuh tlat niin alang. Tute tan nge ? Engtia hman tur nge ?Hemi ni hian Enge kan sawi ang ? Tih te tarlang ta ila.

Mizoramah chuan a mi nawlpui ngaihdan chu V.Day hi inngaizawng, nula leh tlangval leh tleirawlte tan chauh niin kan ngai niin a lang. La urhsun tak tak chu anni age group ho hi chu an ni chiang khawp. Kumtinin, V.Day thlen hma atangin Archies leh Hallmark card te chu hralh a kal em em a, rose sen leh present eng engemaw neuh neuh hralh a kal thin khawp mai. Henga phusa ber hi kan sawi zawh tak nula, tlangval leh tleirawlte an ni tlangpui. Hengte avang hian anni tan hian V.Day hi siam a ni e,..te pawh ti ila kan sawi sual tam lovang.

V.Day kan hriat dan a chunga kan tarlan dan hi a mi nawlpui hriat dan a ni a, hei hi paih a tha ka ti khawp mai. V.Day hi a nihna takah chuan Hmangaih neite tan leh neilote tan pawh hmangaihna lanchhuah tirna Ni a ni. Nulat tlangval laia hmangaih thu inhrilh chamchi a, an han innei ta cheng a, hmangaih thu inhlan tawh ngailo nupa an awm teuh mai. Hei hi a nih dan tur a ni lo. Chuvang chuan V.Day ah hian nupa pawhin an inhmangaih thu inhlan nawn leh se, tin, kan Pathian thuin, Thu chauhva inhmangaih loh tur min tih angin thil pek inpekte hi a va mawi dawn tak em.

Ngaihzawngte chauh hi hmangaih tur emaw kan ti thin, Bible in min zirtir dan chuan keimahni kan inhmangaih ang bawkin kan vengte pawh kan hmangaih tur a ni tih min hrilh. Chuvang chuan V.Day ah hian kan thiante, kan unau te leh kan thenawm khawvengte V.Day duhsakna tawngkam emaw message hlan hi kan tih tur a ni.

Kan hnathawhna, nitin kan office ah, kohhrana kan rawngbawl puite leh kan hmelma te hnenah V.Day hian kan hmangaihna kan hlan tur a ni. Hmangaihna chauh lo chu tuma engmah ba lo turin kan Bible chuan min hrilh a, Kristian tum reng, Kirstian kawm nuam lo an awm tur a ni lo. chuvangin V.Day -ah hi chuan mite tana hnawksak nih tum lo ila, mite tanpui nan leh thlamuan nan hun kan hmang tur a ni.

Mizo hi kan mak khawp mai a, ka nu ka hmangaih che, ka pa ka hmangaih che, bawiha ka hmangaih che. Unua nu, unau pa, ka hmangaih che.. thianpa, thian nu ka hmangaih che tih tawngkam hi kan chhak chhuak khat khawp mai. Hetah hian Mizo ten zirtur pawimawh tak kan nei. Sap ho chu an zin tur inthlah te hi an inhmangaih thu an inhrilh mawlh mawlh thin a, mizote hi engatinge kan sawi zah tlat thin aw..kan tih than loh vang ni maiah ka ngai. Practise ila, kan ti chho ve thei mai ang. Thu chauhva inhmangaih loh tur kan ti a, hmangaihna thu pawh kan sawi chhuah loh phei phei chuan engtin nge kan inhmangaih theih ang.